Aðalfundur Atvinnufélagsins

Höfðabakka 9, Reykjavík - 4. júní 2026, kl. 16:30

Sigmar Vilhjálmsson, formaður, bauð fundarmenn velkomna á aðalfund Atvinnufjelagsins. Stakk hann upp á Ingibjörgu sem fundarritara og tók sjálfur að sér hlutverk fundarstjóra. Var það samþykkt einróma.

Að því búnu var gengið til dagskrár, en næst á dagskrá aðalfundar að kosningu fundarstjóra og fundarritara lokinni var skýrsla stjórnar.

1.     Skýrsla stjórnar fyrir nýliðið starfsár

Starfsárið einkenndist af öflugri hagsmunagæslu og virku samtali við bæði atvinnulífið og stjórnvöld um þau mál sem skipta íslensk fyrirtæki mestu máli.

Eitt af stærstu verkefnum Atvinnufjelagsins á árinu var umfangsmikil fundaröð sem haldin var víða um land í aðdraganda sveitarstjórnarkosninganna. Markmið fundanna var að skapa vettvang fyrir opna og málefnalega umræðu milli atvinnulífsins og þeirra sem buðu sig fram til forystu í sveitarfélögum landsins.

Undir yfirskriftinni „Atvinnulífið er tilbúið – eru sveitarfélögin það líka?“ heimsóttum við Mosfellsbæ, Reykjanesbæ, Árborg, Egilsstaði, Akureyri og Reykjavík. Á hverjum stað komu saman fulltrúar atvinnulífs, frumkvöðlar, fjárfestar og sveitarstjórnarfólk til að ræða tækifæri, áskoranir og stefnu til framtíðar í atvinnuuppbyggingu viðkomandi svæða.

Þrátt fyrir ólíkar aðstæður milli sveitarfélaga komu ákveðin sameiginleg skilaboð skýrt fram. Atvinnulífið telur að tækifærin séu víða mikil, en jafnframt að sveitarfélög þurfi að sýna meira frumkvæði, stytta boðleiðir, flýta afgreiðslu mála og leggja aukna áherslu á atvinnuþróun sem lykilþátt í uppbyggingu samfélaganna.

Í Mosfellsbæ var lögð áhersla á tækifæri í ferðaþjónustu og heilsutengdri starfsemi, auk þess sem bent var á skort á atvinnulóðum og þörf fyrir aukið samstarf við landeigendur. Á Reykjanesi voru tækifæri tengd flugvellinum, Ásbrú og Helguvík í forgrunni, en jafnframt kallað eftir skilvirkari stjórnsýslu og styttri afgreiðslutíma. Í Árborg var rætt um mikilvægi matvælaframleiðslu, ferðaþjónustu og þess að nýta betur þá sterku stöðu sem staðsetning sveitarfélagsins skapar. Á Austurlandi voru samgöngur, fjárfestingar og aukinn sýnileiki svæðisins meðal helstu umræðuefna, en á Akureyri var lögð áhersla á innviði, menntun, nýsköpun og öflugri hagsmunagæslu atvinnulífsins.

Fundaröðin staðfesti mikilvægi þess að atvinnulíf og sveitarfélög eigi reglulegt samtal um samkeppnishæfni, uppbyggingu og framtíðarsókn einstakra landshluta. Hún sýndi jafnframt að atvinnurekendur um allt land vilja taka virkan þátt í mótun samfélaga sinna og að væntingar til sveitarfélaga sem samstarfsaðila atvinnulífsins fara vaxandi.

Jafnframt þessari vinnu lagði Atvinnufjelagið sérstaka áherslu á eitt af stærstu hagsmunamálum íslensks atvinnulífs; þróun tryggingagjalds og áhrif þess á rekstrarumhverfi fyrirtækja. Á starfsárinu áttu fulltrúar félagsins fundi með þingmönnum og ráðherrum þar sem kynnt var skýrsla Atvinnufjelagsins um þróun tryggingagjalds og áhrif þess á samkeppnishæfni íslenskra fyrirtækja.

Viðtökurnar hafa verið jákvæðar og umræður málefnalegar, en jafnframt er ljóst að verkefninu er hvergi nærri lokið. Fyrirhugaðir eru frekari fundir með stjórnvöldum og hagsmunaaðilum á næstu misserum þar sem félagið mun halda áfram að beita sér fyrir breytingum sem styrkja rekstrarskilyrði íslenskra fyrirtækja.

Það er mat stjórnar Atvinnufjelagsins að tryggingagjaldið sé eitt mikilvægasta hagsmunamál lítilla og meðalstórra fyrirtækja á Íslandi. Um er að ræða mál sem snýr ekki aðeins að sanngirni gagnvart atvinnulífinu heldur einnig að rekstrargetu fyrirtækja, fjárfestingum, nýsköpun og möguleikum þeirra til að skapa ný störf. Hlutur launakostnaðar í rekstri fyrirtækja er víða mjög hár og því geta breytingar á tryggingagjaldi haft veruleg áhrif á afkomu, samkeppnishæfni og vaxtarmöguleika fyrirtækja.

Þessi umræða verður ekki síður mikilvæg á komandi misserum þegar fram undan eru krefjandi kjarasamningsviðræður og áframhaldandi hækkun rekstrarkostnaðar víða í atvinnulífinu. Atvinnufjelagið mun áfram vinna að því að sjónarmið atvinnulífsins fái vægi í stefnumótun stjórnvalda og að ákvarðanir um skattlagningu og rekstrarumhverfi fyrirtækja taki mið af raunverulegum aðstæðum þeirra sem skapa verðmæti, atvinnu og velferð í íslensku samfélagi.

Stjórn Atvinnufjelagsins er stolt af þeirri vinnu sem unnin hefur verið á starfsárinu og þeim fjölmörgu samtölum sem átt hafa sér stað við atvinnurekendur, sveitarstjórnarfólk, þingmenn og ráðherra. Þau samtöl hafa staðfest mikilvægi þess að rödd atvinnulífsins heyrist skýrt í opinberri stefnumótun og ákvörðunum sem snerta rekstrarumhverfi fyrirtækja. Atvinnufjelagið mun áfram standa vörð um hagsmuni atvinnulífsins og vinna að því að skapa fyrirtækjum um land allt betri skilyrði til vaxtar, verðmætasköpunar og atvinnuuppbyggingar.

2.     Reikningar félagsins fyrir nýliðið starfsár

Elísabet Jónsdóttir gjaldkeri félagsins fór yfir helstu tölur. Numu félagsgjöld rúmlega 7 millj.kr. og skilaði félagið ríflega 5 m.kr. í afgang. Skuldir félagsins eru engar en einhver félagsgjöld eru útistandandi á eignahliðinni. Stærsti útgjaldapóstur félagsins 2025 eru auglýsingar. Engar spurningar voru bornar upp. Var reikningurinn því borinn upp og var hann samþykktur með öllum greiddum atkvæðum.

3.     Lagabreytingar

Engar lagabreytingar lágu fyrir fundinum en ákveðið var að halda auka aðalfund í haust þar sem lagt verður fyrir að fækka í stjórn og var það samþykkt samhljóða.

4.     Ákvörðun félagsgjalds

Ekki lágu fyrir breytingar á félagsgjaldi.
 
5.     Kosning formanns stjórnar
 
Sigmar var kjörinn formaður með öllum greiddu atkvæðum.
 

6.     Kosning meðstjórnenda
 

Eftirtaldir voru kosnir sem meðstjórnendur: Elísabet Jónsdóttir, Gunnar Ingi Arnarson, Ingibjörg Valdimarsdóttir, Helgi Hrafn Antonsson og Snorri Marteinsson. 
Samþykkt samhljóða.

7.     Kosning varamanna

Ekki lágu fyrir nein framboð til varamanna þannig að þessi fundarliður fellur niður.

8.     Kosning skoðunarmanns

Ómar Davíðsson gaf kost á sér til endurkjörs.
Samþykkt samhljóða.



9.     Ákvörðun um þóknun til stjórnarmanna

Samþykkt var samhljóða að halda þóknun stjórnarmanna óbreyttri frá fyrri ákvörðun eða 35.000 kr þóknun á stjórnarmann á mánuði og tvöfalda þá upphæð til formanns, á meðan framkvæmdastjóri hefur ekki verið ráðinn til félagsins.
 

10. Önnur mál
 

Lagt var til að halda auka aðalfund með haustinu og leggja þar til breytingar á samþykktum félagsins þar sem fjölda í stjórn verði færður í 3-5 og 1 varamann.

Fleira ekki gert. Var fundi slitið laust fyrir kl. 17:30.

/IV