atvinnufelag

Aðalfundur Atvinnufjelagsins 2025

Fri, 30 May 2025 13:16:38 GMT

Í húsnæði Maven, Höfðabakka 9, kl. 16:30. Taktu daginn frá.

Aðalfundur Atvinnufjelagsins 2025 verður haldinn fimmtudaginn 26. júní nk. Fundurinn fer fram í húsnæði Maven ehf., Höfðabakka 9, Reykjavík og hefst hann kl. 16:30.

Á dagskrá eru hefðbundin aðalfundarstörf skv. samþykktum félagsins. Þeir félagsmenn sem hafa áhuga á að bjóða sig fram í stjórn eru vinsamlegast beðnir um að gefa kost á sér með tölvupósti á afj@afj.is með upplýsingum um nafn viðkomandi, kennitölu og aðildarfyrirtæki.

Byggingin að Höfðabakka 9 er eitt af helstu kennileitum Ártúnsholtsins. Gengið er inn að austanverðu. Skrifstofur Maven eru á 5. hæð.

Tryggingagjaldsskýrslan í heild sinni

Sat, 11 Jan 2025 17:11:25 GMT

Þegar betur er að gáð er tryggingagjaldið ekki gjald heldur vanhugsuð skattheimta sem leggst misþungt á fyrirtæki. Eðlilegri og réttlátari framkvæmd væri að reikna gjaldið af heildarveltu en ekki launaveltu. Brýnt að endurskoða framkvæmd gjaldsins að sögn formanns AFj.

Þegar betur er að gáð er tryggingagjaldið ekki gjald heldur vanhugsuð skattheimta sem leggst misþungt á fyrirtæki. Eðlilegri og réttlátari framkvæmd væri að reikna gjaldið af heildarveltu en ekki launaveltu.

Atvinnufjelagi lét nýverið gera úttekt á framkvæmd tryggingagjaldsins , sem leiðir í ljós að það leggst þyngra á fyrirtæki í mannafslfrekum atvinnugreinum og/eða fyrirtæki sem eru í rekstri með hátt launahlutfall.

„Þar sem tryggingjald reiknast af launakostnaði fyrirtækja en ekki heildarveltu verður þetta óhjákvæmilega niðurstaðan,“ segir Sigmar Vilhjálmsson, formaður Atvinnufjelagsins, að vonum heldur óhress þar sem stór hluti lítilla og meðalstórra fyrirtækja eru ýmist í mannaflsfrekum rekstri eða með háan launakostnað, nema hvort tveggja sé.

„Góðu fréttirnar eru hins vegar þær, að það þarf hvorki að vera flókið eða tímafrekt fyrir nýja ríkisstjórn að bæta úr þessu,“ segir Sigmar. „Einfaldasta leiðin væri líklega að miða tryggingagjaldið út frá heildarveltu en ekki launaveltu. Við það myndi það breytast úr launagjaldi í veltugjald og hefði í þeirri útfærslu þurft að vera 1,52% árið 2023 til að skila sömu skatttekjum til ríkíssjóðs. Tryggingagjaldið er þriðji stærsti tekjustofn ríkisins, næst á eftir virðisaukaskatti og tekjuskatti einstaklinga. “

Hér sé því um mikilvæga tekjulind að ræða og tregða stjórnvalda til breytinga sé því að mörgu leyti skiljanleg. „Hins vegar er ekki síður brýnt að stjórnvöld gæti vel að því hvernig skattar eru innheimtir. Afar mikilvægt er að skattaleg áhrif sé eins hlutlaus og hægt er og grafi Í framkvæmd ekki grafa undan verðamætasköpun atvinnulífsins, eins og tryggingagjaldið gerir í reynd,“ segir Sigmar með áherslu.

Tryggingagjald - skattur eða gjald? (pdf)

Málið í hnotskurn (pdf einblöðungur)

Skorað á Valkyrjurnar

Sat, 11 Jan 2025 16:39:23 GMT

Atvinnufjelagið skorar á nýja ríkisstjórn að endurskoða framkvæmd tryggingagjalds. Skattur en ekki gjald sem leggst hlutfallslega þyngst á lítil og meðalstór fyrirtæki, eins og staðfest er í nýrri úttekt Atvinnufjelagsins.

Tryggingargjaldið leggst hlutfallslega þyngra á smærri og meðalstór fyrirtæki samkvæmt úttekt sem Atvinnnfjelegið hefur látið gera á skattalegum áhrifum gjaldsins. Brýnt er að stjórnvöld endurskoði framkvæmd gjaldsins og tryggi með því móti að öll fyrirtæki sitji við sama borð í þessum efnum.

Sérfræðiúttekt sem Atvinnufjelagið hefur látið gera á tryggingagjaldi sýnir að skattaleg áhrif gjaldsins eru afar misjöfn allt eftir atvinnugrein og stærð fyrirtækja.

Hér er er því ekki um hlutlausa gjaldtöku að ræða heldur skatt sem kemur hlutfallslega þyngra niður á fyrirtækjum sem eiga það sammerkt að starfa í mannaflsfrekum atvinnugreinum og/eða verja stærstum hluta rekstrartekna sinna í launakostnað - líkt og á við um mikinn meirihluta lítilla og meðalstórra fyrirtækja í landinu. Úttektin staðfestir, svo að ekki verður um villst, að krafa Atvinnufjelagsins um endurskoðun tryggingagjaldsins á fullan rétt á sér með það fyrir augum að fyrirtæki sitji öll við sama borð í þessum efnum.

Jafnframt bendir Atvinnufjelagið á að fara megi ýmsar leiðir við endurskoðun tryggingagjaldsins. Sem dæmi um réttmætari framkvæmd má benda á þann möguleika að gjaldið reiknist af heildarveltu fyrirtækja en ekki launaveltu, eins og nú er. Veltutengt tryggingagjald hefði þurft að vera 1,52% á árinu 2023 til að skila sömu tekjum til ríkíssjóðs af viðskiptahagkerfinu.

Atvinnufjelagið hefur gefið úttektina út í pdf formi og hvetur allt áhugafólk um réttláta framkvæmd tryggingagjalds til að kynna sér niðurstöður hennar . Skýrslan nefnist „Tryggingagjald - skattur eða gjald“ og má nálgast hana hér .

Sláandi niðurstöður

Sun, 17 Nov 2024 12:35:43 GMT

Niðurstöður nýrrar greiningar á hagrænum áhrifum tryggingagjalds, sem Atvinnufjelagið hefur látið gera, draga skýrt fram hversu misþungt þessi launaskattur leggst á fyrirtæki.

Um sláandi mun er að ræða á milli atvinnugreina, sem hefur verið að aukast á undanförnum árum mannaflsfrekum atvinnugreinum óhag.

Tryggingagjaldið nemur 6,35% og reiknast gjaldið af launagreiðslum fyrirtækja, en það rennur að stærstum hluta eða 75% í lífeyris- og slysatryggingar almannatryggingakerfisins.

Mannaflsfrekar atvinnugreinar standa verst að vígi

Eins og útreikingar Atvinnufjelagsins sýna, getur skipt verulegu máli eftir atvinnugrein hversu þungt þetta gjald leggst á fyrirtæki. Þær atvinnugreinar sem standa að jafnaði verst að vígi eiga það sameiginlegt að vera mannaflsfrekar. Oftar en ekki er um þjónustugreinar að ræða, sem hafa ekki forsendur til að draga úr mannaflsþörf með sjálfvirknivæðingu eða innleiðingu gervigreindar í verkferla.

Á mannamáli þýðir þetta í reynd að ríkissjóður refsar fyrirtækjum með margt starfsfólk fyrir það eitt að vera stór vinnustaður.

Í framkvæmd hefur þetta í för með sér að hlutar vinnumarkaðarins standa undir mun stærri hluta af lífeyris- og slysatryggingagreiðslum ríkisins en aðrir. Það er því að mati Atvinnufjelagsins brýnt að tryggingagjaldið verði endurskoðað með réttlátari skattframkvæmd að markmiði og lagað að jafnari og gagnsærri framkvæmd hvað einstakar atvinnugreinar snertir.

Og vel að merkja, að hér sé um gjald að ræða er rangnefni. Tryggingagjaldið er ekkert annað en skattur og það ranglátur vegna þess að hann brýtur á þeirri mikilvægu meginreglu að skattheimta hafi ekki óæskilegar afleiðingar í för með sér á markaði, ekki nema um beina neyslustýringarskatta sé að ræða sem er beinlínis ætlað að stuðla að breytingum með hagrænum hvötum.

Tökum frekar upp almennt launagjald

Atvinnufélagið telur löngu tímabært að ríki og aðilar vinnumarkaðarins spyrji sig hvort finna megi réttlátari og gagnsærri innheimtuleið.

Með hliðsjón af vægi tryggingagjaldsins fyrir tekjuöflun ríkissjóðs, en tryggingagjaldið er þriðji stærsti tekjustofn ríkisins næst á eftir tekjuskatti og virðisaukaskatti, leggur Atvinnufjelagið til að tryggingjaldi verði breytt í almennt tekjugjald.

Launagjald reiknast af heildartekjum eða veltu fyrirtækja en ekki launagreiðslum og við það jafnast skattheimtan að verulegu leyti út á milli atvinnugreina. Með hliðsjón af heildarveltu fyrirtækja á síðasta ári hefði 1,52% launagjald skilað sömu tekjum til ríkissjóðs og tryggingagjaldið gerði.

Nánari upplýsingar:

Tryggingagjald - skattur eða gjald? (pdf)

Tryggingagjald – skattur eða gjald? (pdf - einblöðungur)

Aðalfundargerð 20.06.2024

ingibjorg@ritari.is (Ingibjörg Valdimarsdottir) — Tue, 25 Jun 2024 14:01:37 GMT

Aðalfundur Atvinnufélagsins

Hilton Reykjavík Nordica, 20.júní 2024, kl. 16:30

Sigmar Vilhjálmsson, formaður, bauð fundarmenn velkomna á aðalfund Atvinnufjelagsins. Stakk hann upp á Ingibjörgu sem fundarstjóra og Helgu Guðrúnu Jónasdóttur sem fundarritara. Var það samþykkt með lófataki.

Ingibjörg þakkaði traustið og gekk að því búnu til dagskrár, en næst á dagskrá aðalfundar að kosningu fundarstjóra og fundarritara lokinni var skýrsla stjórnar. Gaf fundarstjóri því formanni orðið.

1. Skýrsla stjórnar fyrir nýliðið starfsár
Simmi stiklaði á því helst í störfum stjórnar á árinu. Heldur þröngt var til athafna hjá félaginu m.a. vegna fyrirferðar kjarasamninga. Hins vegar er að koma sífellt betur í ljós að ekki er um þá hagstæðu samninga að ræða sem látið hefur verið af, sér í lagi á meðal smærri og meðalstórra fyrirtækja. Nú þegar Alþingiskosningar eru í nánd sagði formaðurinn jafnframt að tækifæri væru að myndast fyrir félagið að vinna að mikilvægustu baráttumálum, s.s. þrepaskiptingu tryggingagjaldsins. Allra mikilvægast væri þó að vinna að stækkun félagsins, og á dagskrá sé hringferð um landið til að safna félögum. Mikilvægt er að hitta forsvarsmenn smærri fyrirtækja að máli, en það virtist ekki síður halda aftur af nauðsynlegri stækkun félagsins að það stendur ekki fyrir beinum sérhagsmunum, heldur talar það munni almennra hagsmuna allra lítilla og meðalstórra fyrirtækja. Þakkaði formaður síðan gott hljóð og lagði skýrsluna undir fundarmenn. Urðu nokkrar umræður um stöðu og stækkun félagsins og þau verkefni sem mikilvægt væri að það sinni í þágu lítilla og meðalstórra fyrirtækja, s.s. að eftirlits- og gjaldakerfi hins opinbera verði lagað að stærð fyrirtækja eftir fjölda starfsmanna og að kjarasamningar verði lagaðir að veruleika meðalstórra og smærri fyrirtækja þ.m.t. veikindaréttur starfsmanna sem fella verði að almenna sjúkratryggingarkerfinu eða taka upp „sænsku leiðina“ þar sem fyrsti dagurinn er ekki greiddur og hluti af veikindadögum þar á eftir er greiddur af sjúkratryggingakerfinu.

2. Reikningar félagsins fyrir nýliðið starfsár
Fundarstjóri benti fundarmönnum því næst á að afrit af ársreikningum lægi frammi á borðum og fór hún yfir helstu tölur í fjarveru Elísabetar Jónsdóttur, gjaldkera félagsins. Numu félagsgjöld liðlega 6.900 þ.kr. og skilaði félagið tæpum fimm m.kr. í afgang. Skuldir félagsins eru engar en einhver félagsgjöld eru útistandandi á eignahliðinni. Stærsti útgjaldapóstur félagsins er þóknun til Ritara sem annast daglegan skrifstofurekstur. Engar spurningar voru bornar upp. Var reikningurinn því borinn upp og var hann samþykktur með öllum greiddum atkvæðum.

3. Lagabreytingar
Fyrir fundinum lág tillaga að breytingu á lögum að stjórnarmönnum verði fækkað úr átta manns í fimm til sjö manna stjórn og var það samþykkt samhljóða.

4. Ákvörðun félagsgjalds
Lagt var til að félagsgjald fylgi verðlagsbreytingum og verði hækkað um 10%
Var það samþykkt með öllum greiddum atkvæðum.

5. Kosning formanns stjórnar
Sigmar var á aðalfundi síðasta árs kjörinn formaður til næstu tveggja ár og á þessi fundarliður því ekki við.

6. Kosning meðstjórnenda
Aðalheiður og Valur gáfu ekki kost á endurkjöri. Eitt framboð barst frá Helga Rafni Antonssyni, framkvæmdastjóra og stofnanda Maven. Aðrir stjórnarmenn gáfu kost á sér til endurkjörs og var því kosið um eftirtalda meðstjórnendur: Ingibjörg Valdimarsdóttir, Helgi Hrafn Antonsson, Helga Guðrún Jónasdóttir, Elísabet Jónsdóttir, Gunnar Ingi Arnarson.
Samþykkt samhljóða.

7. Kosning varamanna
Snorri Marteinsson og Jónína Bjartmarz gáfu kost á sér til endurkjörs.
Samþykkt samhljóða.

8. Kosning endurskoðenda
Ómar Davíðsson gaf kost á sér til endurkjörs.
Samþykkt samhljóða.

9. Ákvörðun um þóknun til stjórnarmanna
Fundarstjóri lagði fyrir fundinn tillögu stjórnar um 35.000 kr þóknun á stjórnarmann á mánuði og tvöfalda þá upphæð til formanns, á meðan framkvæmdastjóri hefur ekki verið ráðinn til félagsins og var það samþykkt samhljóða.

10. Önnur mál
Formaður kvað sér hljóðs undir þessum dagskrárliði og gerði fundinum grein fyrir þreifingum sem stæðu nú yfir um sameiginlega ráðningu framkvæmdastjóra. Gerði formaður stuttlega grein fyrir málinu og sagði að gangi samningaviðræður eftir yrði boðað til sér fundar um það mál. Að máli formanns loknu var orðið gefið laust. Kom m.a. fram tillaga um að Atvinnufjelagið hvetti opinbera aðila til að stunda ekki einokunarstarfsemi með því að eiga viðskipti við fyrirtæki sem standa utan SA. Einnig kom fram tillaga um að Atvinnufjelagið kæmi upp vettvangi þar sem félagsmenn geta boðið öðrum félagsmönnum afsláttarkjör af sínum vörum og þjónustu. Þá hvatti fundarstjóri fundarmenn til að vera í sambandi við stjórn félagsins með ábendingar og góðar hugmyndir.

Fleira ekki gert. Var fundi slitið laust fyrir kl. 17:30.

/HGJ

Skýrsla stjórnar starfsárið 2023-2024

ingibjorg@ritari.is (Ingibjörg Valdimarsdottir) — Tue, 25 Jun 2024 13:43:44 GMT

20.júní 2024

Atvinnufjelagið er á sínu þriðja starfsári en það var stofnað 31. október 2021.

Þetta starfsár hefur litast af kjarasamningum og kjaratengdum málefnum.

Fundað með verkalýðs- og hagsmunafélögum

Félagið átt fundi með bæði verkalýðs- og hagsmunafélögum atvinnurekenda. Það merkilega við stöðuna á vinnumarkaði er að hvorki verkalýðshreyfingin né Samtök Atvinnulífsins hafa mikinn áhuga á því að hlusta á hagsmunamál lítilla og meðalstórra fyrirtækja. Kemur þar mest á óvart að vilji Samtaka Atvinnulífsins til þess að breyta skakkri stöðu í atvinnulífinu og skilningur á málum sem snýr að þeim er ansi lítill, að mati Atvinnufjelagsins.

Stjórnarmönnum er það ljóst að sú vinna sem þarf að eiga sér stað til að ná fram nauðsynlegum breytingum í umhverfi fyrirtækja mun taka tíma. Samtök Atvinnulífsins eru gríðarlega stór og öflug samtök og á meðan þau eru hreinlega mótfallin breytingum sem gagnast litlum og meðalstórum fyrirtækjum, þá munu þau ekki vinna að framgangi þeirra breytinga.

Stækka þarf Atvinnufjelagið enn frekar

Stjórn Atvinnufjelagsins hefur átt fundi með framamönnum stjórnmálanna sem oft á tíðum vita ekki hversu skökk staðan er í atvinnulífinu. Allir hafa verið mjög áhugasamir með það sem við höfum lagt fram en það virðist skorta nægilega mikinn þrýsting til þess að hreyfa nálina.

Það er því alveg ljóst að Atvinnufjélagið þarf á fleiri félagsmönnum að halda sem eru tilbúnir að greiða árgjöld og tryggja þar með rekstrargrundvöll félagsins. Með auknum skráningum og auknum fjármunum mun félagið eiga kost á því að ráða starfsmann/-menn sem geta unnið betur að hagsmunum félagsmanna en stjórn í sjálfboðavinnu.

Stjórnarmenn Atvinnufjélagsins hafa unnið alla sína vinnu í sjálfboðavinnu og sem atvinnurekendur sjálfir, þá er þetta mikil aukavinna samhliða öllum þeim verkum sem snúa að atvinnurekendum lítilla og meðalstórra fyrirtækja dagsdaglega.

Það er því nauðsynlegt að skerpa á þeim skyldum og framlagi stjórnarmanna á meðan félagið er ekki komið með starfsmann/-menn. Það liggur því tillaga fyrir aðalfund að greiða stjórnarmönnum fyrir sína vinnu og með því gera ríkari kröfu á stjórnarmenn að þeir klári verkefni sín og skyldur.

Skakkt rekstrarumhverfi atvinnulífsins

Það er öllum ljóst sem eru í atvinnurekstri á Íslandi, að umhverfið er ójafnt. Tryggingagjaldið er besta dæmið um það hvernig hið opinbera kallar skatt gjald og þar með hægt að setja reglurnar upp með þeim hætti sem tryggingagjaldið er. Það er í raun „launþega skattur“ þar sem fyrirtæki greiðir gjöld í opinbera sjóði útfrá þeim launamönnum sem eru í vinnu hjá viðkomandi fyrirtæki. Slík fyrirtæki eru ekki bara atvinnuskapandi með tilheyrandi tekjum til hins opinbera, heldur er bætt við tryggingagjaldi sem nemur 6,35%. Aðeins hluti af tryggingagjaldinu fer í atvinnutryggingagjald (1,35%) og ábyrgðasjóð launa (0,05%), aðrar fjárhæðir í tryggingagjaldinu fara í samfélagsleg málefni (fæðingarorlof, lífeyristryggingar o.fl.) og því alveg með öllu galið að það liggi þyngra á fyrirtækjum sem eru með hátt launahlutfall en þeirra sem eru með lágt launahlutfall. Það er ljóst að lítil og meðalstór fyrirtæki eru hlutfallslega með mun hærra launahlutfall en stór fyrirtæki.

Þessi hrópandi skekkja í umhverfi fyrirtækja er eitt af mörgum dæmum um það hvernig rekstrarumhverfið er hreinlega skakkt og óréttlátt.

Atvinnufjélagið hefur lagt fram tillögur um að breyta þessu gjaldi, sem átti að vera tímabundin aðgerð til að bjarga íslandi úr bankahruni, í skatt. Þetta er ekkert annað en skattur og er ekki á leiðinni út úr tekjustofni Ríkissjóðs. Um er að ræða 142 m.a. kr. á ári. Það þarf því að finna sanngjarna prósentu sem leggst jafnt á öll fyrirtæki í landinu útfrá veltu þannig að fyrirtæki hér á landi sitji við sama borð.

Tryggingagjaldinu er ætlað að ráðstafa í grunnstoðir í samtryggingakerfi okkar Íslendinga og því eðlilegt að slíkt komi jafnt frá öllum fyrirtækjum landsins.

Fleira mætti telja upp sem liggur hlutfallslega þyngra á litlum og meðalstórum fyrirtækjum eins ogbifreiðagjöld, olíugjöld, áfengisgjöld, gistináttaskattur ofl. en listinn er langur og ekki tæmandi hér í upptalningunni.

Það má spyrja sig að því afhverju Samtök Atvinnulífsins eru ekki að beita sér fyrir jafnara umhverfi atvinnulífsins þrátt fyrir að vita af þessari skekkju. En til þess var nú Atvinnufjelagið stofnað. Það þarf að breyta og jafna stöðu fyrirtækja á Íslandi og það gerist ekki án þess að knýja fram breytingar.

Þess vegna skiptir máli að öll lítil og meðalstór fyrirtæki hér á landi snúi bökum saman og skrái sitt félag í Atvinnufjélagið.

Stjórn Atvinnufjelagins

Er dýrt að reka fyrirtæki á Íslandi

ingibjorg@ritari.is (Ingibjörg Valdimarsdottir) — Wed, 19 Jun 2024 14:42:17 GMT

19.júní 2024

Sigmar Vilhjálmsson, formaður Atvinnufjelagsins, mætti í viðtal í Bítið á Bylgjunni þar sem hann ræddi um fyrirtækin í landinu og hvernig hægt er að bæta stöðu þeirra.

Viðtalið má nálgast hér.

Atvinnufjelagið kallar eftir myndarlegri aðkomu stjórnvalda að kjaraviðræðum

ingibjorg@ritari.is (Ingibjörg Valdimarsdottir) — Thu, 30 Nov 2023 09:22:22 GMT

29.nóv. 2023

Formaður Atvinnufjelagsins, Sigmar Vilhjálmsson, mætti í viðtal í Reykjavík síðdegis til að fara yfir kjaraveturinn framundan og þær áherslur sem AFJ vill leggja inn í þær viðræður til að vernda hagsmuni lítilla og meðalstórra fyrirtækja.

Viðtalið má nálgast hér.

Stjórn fundar með formanni Starfsgreinasambandsins

ingibjorg@ritari.is (Ingibjörg Valdimarsdottir) — Fri, 20 Oct 2023 12:24:41 GMT

20.okt.2023

Stjórn AFJ fundaði með Vilhjálmi Birgissyni, formanni Starfsgreinasambandsins í vikunni og ræddi við hann um áherslur félagsins þegar kemur að litlum og meðalstórum fyrirtækjum í komandi kjaraviðræðum.

Rætt var um að í sameiningu þyrfti að auka kaupmátt launafólks og yrði það ekki gert án aðkomu ríkisins.

Það er álit félagsins að nauðsynlegt er að kaupmáttur launa aukist án þess að hækka þurfi verð. Það er mikilvægt til að sporna við verðbólgu og ekki síður er það mikilvægt til að standa vörð um kaupgetu viðskiptavina lítilla og meðalstórra fyrirtækja.

Til þess að það gerist þarf aðkomu ríkisins og er stjórn AFJ með nokkrar tilllögur þess efnis sem ræddar voru á þessum fundi.

Nýtt starfsár hafið hjá Atvinnufjelaginu

ingibjorg@ritari.is (Ingibjörg Valdimarsdottir) — Fri, 15 Sep 2023 12:02:10 GMT

Nýr liðsfélagi í stjórn AFJ

Ný stjórn hittist á fyrsta fundi nýs starfsárs og byrjaði þar að bjóða Val Stefánsson, nýjan stjórnarmann formlega velkominn í stjórnina.

Kjaraviðræður vetrarins

Á fundinum voru ýmis mál rædd en hæst bar á málum sem félagið vill koma að inn í komandi kjaraviðræður. Ljóst er að veturinn verður ansi harður.

Rætt var að benda sérstaklega á veikindarétt starfsmanna og hvernig sá réttur liggur alfarið á atvinnurekendum. Skítur það skökku við að slíkt sé á ábyrð atvinnurekenda en ekki samfélagsins í heild, enda búum við hér á landi með samtryggingakerfi að norrænni fyrirmynd.

Hér er ekki verið að tala um að skerða rétt starfsmanna, alls ekki, heldur að færa ábyrgðina þangað sem hún á heima. Atvinnurekendur greiða 1% af launum í sjúkrasjóði lífeyrissjóða en samt sem áður liggur kostnaður vegna veikindaréttar hjá fyrirtækjum.

Veikindaréttur ætti réttilega að vera greiddur úr sameiginlegum veikindasjóði atvinnulífsins þar sem hann leggst hlutfallslega verst á lítil og meðalstór fyrirtæki sem eiga ekki að þurfa að taka mestu áhættuna á veikindum starfsmanna á hinum almenna vinnumarkaði. Benda má á útfærslur á þessu á Norðurlöndunum þá sérstaklega Svíþjóð.

Ákveðið var að fara í að fá fundi með stjórnmálamönnum, forsvarsmönnum hagsmunafélaga atvinnulífsins og stéttarfélaganna til að sjá hvort aðilar geti ekki unnið saman að sameiginlegum réttlætismálum.

Aðstoð við félagsmenn

Rætt var að fara í að skoða að semja við lögfræðistofu til að veita félagsmönnum AFJ ráðleggingar varðandi vinnurétt og önnur slík mál sem geta komið upp.

Farið var yfir þær ábendingar og hugmyndir sem hafa komið frá félagsmönnum í gegnum netfang félagsins og þær ræddar. Margar mjög góðar ábendingar og hugmyndir hafa komið á borð stjórnar sem munu nýtast vel í starfi vetrarins.

Spenna er fyrir komandi starfsári og verður settur kraftur í að koma málefnum félagsmanna á framfæri í kjaraviðræður og eins til hins opinbera.

Stjórn Atvinnufjelagsins

Aðalfundargerð 28.06.2023

ingibjorg@ritari.is (Ingibjörg Valdimarsdottir) — Tue, 04 Jul 2023 12:42:38 GMT

Fundargerð

Aðalfundur Atvinnufélagsins
Grand Hótel Reykjavík, 28. júní 2023, kl. 16:30

Sigmar Vilhjálmsson, formaður, bauð aðalfundarfólk velkomið og setti fundinn. Því næst lagði hann til að Ingibjörg Valdimarsdóttir tæki að sér fundarstjórn og Aðalheiður Jacobsen ritun fundargerðar og var það einróma samþykkt.

Ingibjörg þakkaði viðstöddum traustið og kannaði að því búnu hvort löglega hafi verið boðað til fundarins. Svo reyndist vera og var þá gengið til venjubundinna aðalfundarstarfa skv. dagskrá.

Fyrst á dagskrá var skýrsla stjórnar og bauð fundarstjóri Sigmari Vilhjálmssyni orðið.

Er formaður hafði lokið máli sínu, þakkaði fundarstjóri honum fyrir greinargóða skýrslu og lagði að því búnu til að fyrirspurnir og umræður um skýrsluna yrðu teknar eftir kynningu á ársreikningum. Var það einróma samþykkt. Fundarstjóri gaf þá orðið Elísabetu Jónsdóttur, stjórnarkonu, sem haldið hefur utan um fjármál félagsins.

Í yfirferð Elísabetar kom m.a. fram að tekjur voru samtals um 4,2 milljónir króna og útgjöld Atvinnufjelagsins væru 2,2 milljónir. Félagið á samtals 5,2 milljónir í eigið fé.

Er Elísabet hafði lokið máli sínu opnaði fundarstjóri á fyrirspurnir og umræður um skýrslu stjórnar og ársreikning. Að umræðum loknum bar fundarstjóri svo upp skýrslu og ársreikninga, sem fundarmenn samþykktu samhljóða.

Næst á dagskrá fundarins voru lagabreytingar en engar breytingar lágu fyrir fundinum og því var haldið í næsta lið.

Næst á dagskrá var ákvörðun félagsgjalda og lagði stjórn til að félagsgjöld yrðu óbreytt á milli ára og var það samþykkt.

Félagsgjöldin á starfsárinu 2023-2024 verða því sem hér segir:

Einyrkjar kr. 35.000
2-9 stöðugildi kr. 75.000
10-19 stöðugildi kr. 125.000
20-49 stöðugildi kr. 175.000
50-99 stöðugildi kr. 250.000
100 eða fleiri kr. 350.000
Félagasamtök kr. 500.000

Verða þær innheimtar í tvennu lagi, fyrri helmingur um mitt árið og seinni helmingur í lok árs.

Næst á dagskrá var stjórnarkjör og skal skv. samþykktum formaður stjórnar kjörinn fyrst. Fyrir fundinum lá framboð Sigmars Vilhjálmssonar og lýsti fundarstjóri eftir fleiri framboðum. Aðrir gáfu ekki kost á sér. Fundarstjóri bar því fram tillögu um endurkjör Sigmars Vilhjálmssonar og var hún einróma samþykkt.

Gekk fundarstjóri þá að næsta dagskrárlið sem var kosning sex meðstjórnenda. Fyrir fundinum lá framboð Aðalheiðar V. Jacobsen, Elísabetar Jónsdóttur, Gunnars Inga Arnarsonar , Helgu Guðrúnar Jónasdóttur og Ingibjargar Valdimarsdóttur. Þeir sem ekki bjóða sig áfram fram og víkja úr stjórn er Ómars Þorgils Pálmasonar. Fundarstjóri lýsti eftir öðrum framboðum og bauð Valur Stefánsson sig fram. Fundarstjóri bar fram tillögu um kjör áðurnefndra sem meðstjórnenda og var það samþykkt einróma.

Þá lágu fyrir fundinum tillaga um Jónínu Bjartmarz og Snorra Marteinssonar í varastjórn. Önnur framboð bárust ekki og var framboð þeirra einróma samþykkt. Hvað skoðunarmann félagsins snertir var tillaga um Ómar Davíðsson einróma samþykkt, en aðrar tillögur um skoðunarmann voru ekki gerðar.

Næst á dagskrá aðalfundarins var ákvörðun um þóknun til stjórnarmanna fyrir komandi starfsár. Fráfarandi stjórn gerði tillögu um að stjórnarlaun verði ekki greidd til stjórnarmanna að þessu sinni, líkt og verið hefur hjá fráfarandi stjórn og var það einróma samþykkt.

Fyrir lág erindi varðandi nýsköpunar- og frumkvöðlastarf og verða þau mál tekin betur fyrir í stjórn þegar frekari upplýsingar liggja fyrir.

Fleira var ekki gert og var aðalfundi slitið kl. 17:15

/AJ

Skýrsla stjórnar starfsárið 2022-2023

ingibjorg@ritari.is (Ingibjörg Valdimarsdottir) — Thu, 29 Jun 2023 10:25:31 GMT

Það er langhlaup að búa til sterkt félag

Atvinnufjelagið er langhlaup. Það að breyta því umhverfi sem við búum við í Íslensku atvinnulifi gerist ekki á einni nótt. En þetta langhlaup hefst á því að flestöll lítil og meðalstór fyrirtæki sameinist á einum stað. Atvinnufjelagið er sá staður, enda er hver skráning með eitt atkvæði í AFJ og því verða ákvarðanir og stefnumál félagsis ákvörðuð á breiðum hagsmunagrunni félagsmanna en ekki sérhagsmunum.

Sú vinna að upplýsa atvinnurekendur lítilla og meðalstórra fyrirtækja um hagsmuni þeirra er tímafrek, það er engum blöðum um það að fletta. Stjórn AFJ hefur alfarið séð um þá vinnu samhliða sínum störfum í að reka sín eigin fyrirtæki. Félagið hefur verið afar passasamt á þá fjármuni sem eru í félaginu og því ekki ráðið starfsmenn né greitt fyrir stjórnarsetu eða aðstöðu.

Næstu skref

Til þess að taka næstu skref, ráða inn starfsmann og herja á kynningarstarf á almennum markaði, þá þurfum við að fjölga félagsmönnum, auka í sjóðum félagsins áður en lagt er af stað í slíka vegferð. Það er því gríðarlega mikilvægt fyrir AFJ að félagsmenn leggist á eitt og hvetji aðra atvinnurekendur til að skrá sig og taka þátt í þessari uppbyggingu. Þetta er langhlaup og þetta eru hagsmunir allra lítilla og meðalstórra fyrirtækja sem eru hér undir.

Nýtt starfsár

Nýtt starfsár Atvinnufjelagsins hófst í september. Þá hallaði verulega á lítil og meðalstór fyrirtæki í samfélagsumræðunni og lítil áhersla var á hagsmuni þeirra innan verkalýðshreyfingarinnar. Mikið var rætt um verkföll og mikil ókyrrð innan verkalýðshreyfingarinnar.

Það var mat stjórnar AFJ að blanda sér ekki í þann leðjuslag sem kjaraviðræðurnar reyndust vera. Á sama tíma óskaði AFJ eftir því að fá fundi með verkalýðsforrystunni sem vildi ekki svara óskum okkar um að fá sæti við borðið. Lögfræðilegt álitamál er um hvort að verkalýðshreyfingin hafi leyfi til að neita slíku, enda umboð AFJ fyrir félagsmenn sína óumdeilt.

SVEIT, Samtök fyrirtækja á veitingamarkaði , hafa höfðað mál gegn Eflingu vegna þessa og mun það verða fordæmisskapandi og er AFJ í góðum tengslum við SVEIT um gang mála í því.

Ný stjórn

Ný stjórn AFJ tók til starfa með tvo nýja fulltrúa frá Atvinnurekendadeild FKA (AFKA), þær Aðalheiði Jacobsen og Ingibjörgu Valdimarsdóttur. Innan þeirra raða er mikill áhugi á félaginu og fara hagsmunir þeirra vel saman við áherslumál AFJ. AFKA er góður liðsauki við okkar sameiginlegu baráttu fyrir hagsmunum lítilla og meðalstórra fyrirtækja.

Fundir stjórnar hafa verið reglulegir og gagnlegir. Að mörgu er að huga og því hefur mestur tími farið í að forgangsraða áherslumálum. Niðurstaðan er sú að til að byrja með mun AFJ leggja aðaláherslu á skattalegt umhverfi lítilla og meðastórra fyrirtækja og þá sérstaklega tryggingagjaldið sem og þjónustugjöld og þóknanir til hins opinbera. Þar hallar verulega á lítil og meðalstór fyrirtæki í samaburði við stór fyrirtæki. Þegar rætt er um lítil fyrirtæki er átt við fyrirtæki með 1 til 10 starfsmenn og meðal stór fyrirtæki eru með 10 til 180 starfmenn. Þessi fyrirtæki eru um 90% allra fyrirtækja á Íslandi.

A-FKA hélt kynningarfund í byrjun starfsárs með sínum félagskonum þar sem stjórn AFJ kynnti sín áherslumál og sameiginlegu hagsmuni AFKA og AFJ.

Hagsmunarbarátta AFJ

AFJ hefur beitt sér fyrir því að tekið sé tillit til hagsmuna lítilla og meðalstórra fyrirtækja í kjara-viðræðum og ítrekað bent á að hagsunir þeirra og stórfyrirtækja innan SA fara ekki saman. Í því sambandi bentum við á sérkjarasamninga sem gerðir hafa verið milli verkalýðsfélaga og einstakra atvinnurekenda og dregið fram í dagsljósið m.a. kjarasamning VR og Dressman þar sem dagvinnu-taxtar eru aðrir og rýmri en þeir sem VR almennt miðar við.

AFJ hefur lagt áherslu á að fá samtal við sem flesta í þeim tilgangi að skapa umræðu um þessi hagsmunamál og hefur stjórnin m.a. rætt við ríkissáttasemjar, fjármálaráherra, formenn og forystumenn stjórnmálaflokka og verkalýðshreyfingarinnar. Allir aðilar eru sammála að betur má fara í hagsmunamálum lítilla og meðalstórra fyrirtækja. En áhugi á breytingum virðist ekki vera mikill í að breyta því kerfi sem fyrir er. Er það mat stjórnar AFJ að til þess að knýja fram breytingar þarf félagið að stækka og slagkraftur þess þarf að verða meiri.

Sigmar Vilhjálmsson formaður stjórnar AFJ hefur verið ötull talsmaður okkar og hefur mætt í fjölmörg útvarpsviðtöl. Nú nýverið skrifað Sigmar stórgóða grein um þessi mál þar sem hann bendir á hlutverk hins opinbera í að leiðrétta stöðu okkar fyrirtækja. Undirtektir hafa verið góðar og umræður skapast í kjölfarið, en betur má ef duga skal og við erum rétt að byrja.

Atvinnufjelagið er að vaxa og góðir hlutir gerast hægt. Það er því miklvægt að hlúa að hagsmunum lítilla og meðalstórra fyrirækja og til þess þurfum við öfluga félagsmenn og fleiri félagsmenn.

Stjórn Atvinnufjelagsins

Í tilefni aðalfundar AFJ 2023

ingibjorg@ritari.is (Ingibjörg Valdimarsdottir) — Mon, 26 Jun 2023 10:15:18 GMT

Rekstur Atvinnufjelagsins

Starfssemi og rekstur Atvinnufjelagsins hefur frá upphafi byggst á sjálfboðavinnu stjórnarmanna. Félagið er í uppbyggingu og allir sem koma að starfi félagsins gera sér grein fyrir því að um er að ræða langhlaup til þess að breyta rekstrarumhverfi lítilla og meðalstórra fyrirtækja á Íslandi. Verkefnið er risavaxið og kostnaðarsamt.

Öll félagsgjöld félagsins liggja nánast óhögguð á reikningi félagsins, að undanskyldum grunnkostnaði við endurskoðun, lögfræðiþjónustu og bókhaldskerfis. Ætlunin er að safna upp fé í sjóðum félagsins til þess að geta einn daginn ráðið starfsmann og starfsmenn til að sinna hagsmunagæslu og fræðslustarfi félagsmanna. Enda ljóst að þeir sem að félaginu koma eru sjálfir atvinnurekendur og hafa fullt fang af viðfangsefnum í sínum eigin rekstri. Óeigingjörn vinna þeirra hefur því verið unnin utan vinnutíma eða hreinlega rýmt til í dagskránni til að sinna hagsmunamálum félagsmanna. Öll gerum við okkur grein fyrir því að slíkt fyrirkomulag gengur ekki til lengdar og með slíku fyrirkomulagi vinnast sigrarnir hægt.

Næstu skref

Til þess að taka næstu skref í félaginu þá þarf að safna fleiri félagsmönnum og tryggja það að þeir sem hafa skráð sig í félagið hafi þolinmæði fyrir vexti félagsins og greiði iðgjöld samviskusamlega. Það er því mjög mikilvægt fyrir félagsmenn að hafa úthald og þolinmæði fyrir vexti félagsins, enda eru málefni félagsins gríðarlega mikilvæg fyrir öll lítil og meðalstór fyrirtæki hér á landi. Síðustu mánuðir og ár hafa sýnt okkur, svo ekki verður um villst, að þörfin á því að stjórnvöld sýni litlum og meðalstórum fyrirtækjum hér á landi meiri skilning er gríðarlega mikil.

Ójafnvægi milli fyrirtækja

Gjaldskrár hins opinbera og skattaumhverfi fyrirtækja hér á landi liggja hlutfallslega þyngra á litlum og meðalstórum fyrirtækjum. Það er ekkert sem réttlætir slíkt ójafnvægi. Kjaramál hafa sjaldan verið í meiri ólestri þar sem lítil og meðalstór fyrirtæki hafa ekki haft svo mikið sem eina rödd. Samt eru lítil og meðalstór fyrirtæki yfir 90% allra fyrirtækja á Íslandi. Það má því segja að nánast allt atvinnulífið sé fast á milli deilna stórfyrirtækja og verkalýðshreyfingarinnar. Til að bæta gráu ofan á svart, þá hafa launahækkanir opinberra starfsmanna sjaldan verið meiri og bara það að opinberir starfsmenn séu með hærri meðallaun en almennur vinnumarkaður sýnir á hversu miklum villigötum launa- og kjaramál eru hér á landi.

Sterkari saman

Ef lítil og meðalstór fyrirtæki sameinast í einu og sama félaginu, þá er slagkraftur slíks félags það mikill að ekki verður hægt horft framhjá því. Allir atvinnurekendur og ráðamenn sem kynna sér baráttumál Atvinnufjélagsins eru sammála um að þetta sé réttlætismál. Hér eru ekki á ferðinni sérhagsmunir heldur almennir hagsmunir og leiðrétting á kerfi sem hefur misst algjörlega taktinn við atvinnulífið í landinu. Það er því gríðarlega mikilvægt að allir atvinnurekendur lítilla og meðalstórra fyrirtækja sameinist og styrki stoðir Atvinnufjelagsins með skráningu og félagsgjöldum. Því fyrr sem félagið verður stórt, því fyrr næst árangur sem skiptir máli.

Sigmar Vilhjálmsson, formaður Atvinnufjelagsins.

Fréttabréf AFJ - starfsárið 2022-2023

ingibjorg@ritari.is (Ingibjörg Valdimarsdottir) — Wed, 21 Jun 2023 15:13:49 GMT

Starfsemi Atvinnufjelagsins starfsárið 2022-2023

Breytingar taka tíma og vinnu

Það að breyta því umhverfi sem við búum við í íslensku atvinnulífi gerist ekki á einni nótt. Það tekur tíma að koma Atvinnufjelaginu í almennilegan rekstur og er það langhlaup.Þetta langhlaup hefst á því að flestöll lítil og meðalstór fyrirtæki sameinist á einum stað. Atvinnufjelagið er sá staður, enda er hver skráning með eitt atkvæði í félaginuog því verða ákvarðanir og stefnumál félagsins ákvörðuð á breiðum hagsmunagrunni félagsmanna en ekki sérhagsmunum.

Sú vinna að upplýsa atvinnurekendur lítilla og meðalstórra fyrirtækja um hagsmuni þeirra er tímafrek, það er engum blöðum um það að fletta. Stjórn AFJ hefur alfarið séð um þá vinnu samhliða sínum störfum við að reka sín eigin fyrirtæki. Félagið hefur verið afar passasamt á þá fjármuni sem eru í félaginu og því ekki ráðið starfsmenn né greitt fyrir stjórnarsetu eða aðstöðu.

Til þess að taka næstu skref, ráða inn starfsmann og herja á kynningarstarf á almennum markaði, þá þurfum við að fjölga félagsmönnum og auka í sjóðum félagsins áður en lagt er af stað í slíka vegferð. Það er því gríðarlega mikilvægt fyrir AFJ að félagsmenn leggist á eitt og hvetji aðra atvinnurekendur til að skrá sig og taka þátt í þessari uppbyggingu. Þetta er langhlaup og þetta eru hagsmunir allra lítilla og meðalstórra fyrirtækja sem eru hér undir.

Kjaraviðræðurnar

SVEIT, Samtök fyrirtækja á veitingamarkaði, hafa höfðað mál gegn Eflingu vegna þessa og mun það verða fordæmisskapandi og er AFJ í góðum tengslum við SVEIT um gang mála í því.

Ný stjórn kosin á vormánuðum 2022

Ný stjórn AFJ tók til starfa með tvo nýja fulltrúa frá Atvinnurekenda AUÐUR (áður Atvinnurekendadeild FKA), þær Aðalheiði Jacobsen og Ingibjörgu Valdimarsdóttur. Innan þeirra raða er mikill áhugi á félaginu og fara hagsmunir þeirra vel saman við áherslumál AFJ. Atvinnurekenda AUÐUR er góður liðsauki við okkar sameiginlegu baráttu fyrir hagsmunum lítilla og meðalstórra fyrirtækja.

Atvinnurekenda AUÐUR hélt kynningarfund í byrjun starfsárs með sínum félagskonum þar sem stjórn AFJ kynnti sín áherslumál og sameiginlegu hagsmuni þeirra og AFJ.

Hagsmunir AFJ og samtal við forystumenn

AFJ hefur beitt sér fyrir því að tekið sé tillit til hagsmuna lítilla og meðalstórra fyrirtækja í kjara-viðræðum og ítrekað bent á að hagsmunir þeirra og stórfyrirtækja innan SA fara ekki saman. Í því sambandi bentum við á sérkjarasamninga sem gerðir hafa verið milli verkalýðsfélaga og einstakra atvinnurekenda og dregið fram í dagsljósið m.a. kjarasamning VR og Dressman þar sem dagvinnu-taxtar eru aðrir og rýmri en þeir sem VR almennt miðar við.

AFJ hefur lagt áherslu á að fá samtal við sem flesta í þeim tilgangi að skapa umræðu um þessi hagsmunamál og hefur stjórnin m.a. rætt við ríkissáttasemjar, fjármálaráherra, formenn og forystumenn stjórnmálaflokka og verkalýðshreyfingarinnar. Allir þessir aðilar eru sammála að betur megi fara í hagsmunamálum lítilla og meðalstórra fyrirtækja. En áhugi á breytingum virðist ekki vera mikill í að breyta því kerfi sem fyrir er. Er það mat stjórnar AFJ að til þess að knýja fram breytingar þarf félagið að stækka og slagkraftur þess þarf að verða meiri.

Stjórn Atvinnufjelagsins

Aðalfundargerð 29.06.2022

Sun, 10 Jul 2022 10:45:22 GMT

Fundargerð

Aðalfundur Atvinnufélagsins
Grósku, 29. júní 2022, kl. 16:30

Sigmar Vilhjálmsson, formaður, bauð aðalfundarfólk velkomið. Því næst lagði hann til að Auður Ýr Helgadóttir tæki að sér fundarstjórn og Helga Guðrún Jónasdóttir ritun fundargerðar og var það einróma samþykkt.

Auður Ýr þakkaði viðstöddum traustið og kannaði að því búnu hvort löglega hafi verið boðað til fundarins. Svo reyndist vera og var þá gengið til venjubundinna aðalfundarstarfa skv. dagskrá.

Fyrst á dagskrá var skýrsla stjórnar og bauð fundarstjóri Sigmari Vilhjálmssyni orðið. Í yfirferð formanns yfir störf stjórnar á þessu fyrsta starfsári Atvinnufjelagsins kom m.a. fram að stjórnarmenn hafi lagst á eitt um að koma fótum undir starfsemi félagsins. Kröftunum hafi aðallega verið beint að kynningu og markaðssetningu Atvinnufjelagsins gagnvart annars vegar einyrkjum og litum og meðalstórum fyrirtækjum og hins vegar verkalýðshreyfingunni, ríkissáttasemjara, ráðherrum og öðrum hagaðilum félagsins.

Þá greindi formaður frá því að atvinnurekendadeild Félags kvenna í atvinnulífinu (A-FKA) hafi ákveðið að ganga til liðs við Atvinnufjelagið nú í sumarbyrjun. Þetta væru góð tíðindi fyrir einyrkja, lítil og meðalstór fyrirtæki. Því betur sem gengur að byggja upp félagagrunn Atvinnufjelagsins þeim mun sterkari rödd muni þessi hingað til þögli meirihluti atvinnurekenda öðlast á vinnumarkaðnum. Helsta verkefni nýrrar stjórnar verði að halda þessu mikilvæga uppbyggingarstarfi áfram, svo færa megi starfsemi félagsin á næsta stig með starfsmannaráðningum. Að lokum vék formaður að stöðunni á vinnumarkaði, nú í aðdraganda kjarasamningagerðar í haust. Blikur séu á lofti í efnahagsmálum m.t.t. verðlagsþróunar og versnandi ytri aðstæðna. Ljóst væri því að forsenda þess að heillavænlegir kjarasamningar náist sé, að allir aðilar vinnumarkaðarins stefni að því marki og sýni með því móti ábyrgð í verki.

Í yfirferð Elísabetar kom m.a. fram að tekjur voru samtals um 4,4 milljónir króna og útgjöld Atvinnufjelagsins á þessu fyrsta starfsári 1,2 milljónir væru nær alfarið vegna markaðs- og kynningarkostnaðar, heimasíðu o.fl. . Þar sem félagið hefði verið stofnað seint á síðasta ári, hefði verið ákveðið að rukka aðeins hálft árgjald. Innheimtur hefðu verið góðar og ætti félagið ríflega tvær milljónir króna í sjóði. Í framtíðinni yrði árgjald innheimt í tvennu lagi um áramót og um mitt ár.

Er Elísabet hafði lokið máli sínu opnaði fundarstjóri á fyrirspurnir og umræður um skýrslu stjórnar og ársreikning. Líflegar umræður spunnust á almennum nótum um starfsemi Atvinnufjelagsins og þá mikilvægu þýðingu sem stofnun þess hefur fyrir stöðu einyrkja, og lítilla og meðalstórra fyrirtækja á vinnumarkaði. Að umræðum loknum bar fundarstjóri svo upp skýrslu og ársreikninga, sem fundarmenn samþykktu samhljóða.

Næst á dagskrá fundarins voru lagabreytingar. Í aðalfundarboði voru tíundaðar breytingartillögur á samþykktum Atvinnufjelagsins. Fundarstjóri fór yfir helstu breytingar á samþykktum sem m.a. lúta að fyrirkomulag á innheimtu félagsgjalda, aðild félagasamtaka að Atvinnufjelaginu og fækkun stjórnarmanna úr 8 í 7 ásamt fyrirkomulagi stjórnarkjörs. Kynnti fundarstjóri þessar tillögur og bar því næst undir fundinn hvort afgreiða mætti allar tillögur í einu lagi. Var það samþykkt og voru að því búnu tillögurnar samþykktar með öllum greiddum atkvæðum.

Næst á dagskrá var ákvörðun félagsgjalda. Kynnti fundarstjóri tillögu fráfarandi stjórnar um óbreytt félagsgjöld og var það samþykkt einróma af fundarmönnum. Félagsgjöldin á starfsárinu 2022-2023 verða því sem hér segir:

Einyrkjar kr. 35.000
2-9 stöðugildi kr. 75.000
10-19 stöðugildi kr. 125.000
20-49 stöðugildi kr. 175.000
50-99 stöðugildi kr. 250.000
100 eða fleiri kr. 350.000
Félagasamtök kr. 500.000

Verða þær innheimtar í tvennu lagi eins og áður var getið um og núna næst um þessi mánaðarmót. Næst á dagskrá var stjórnarkjör og skal skv. samþykktum formaður stjórnar kjörinn fyrst. Fyrir fundinum lá framboð Sigmars Vilhjálmssonar og lýsti fundarstjóri eftir fleiri framboðum. Aðrir gáfu ekki kost á sér. Fundarstjóri bar því fram tillögu um endurkjör Sigmars Vilhjálmssonar og var hún einróma samþykkt.

Gekk fundarstjóri þá að næsta dagskrárlið sem var kosning sex meðstjórnenda. Fyrir fundinum lá framboð Aðalheiðar V. Jacobsen (A-FKA), Elísabetar Jónsdóttur, Gunnars Inga Arnarsonar , Helgu Guðrúnar Jónasdóttur, Ingibjargar Valdimarsdóttur (A-FKA) og Ómars Þorgils Pálmasonar. Aðalheiður og Ingibjörg koma nýjar í stjórnina en þeir sem ekki bjóða sig áfram fram og víkja því úr stjórn eru Arna Þorsteinsdóttir, Auður Ýr Helgadóttir og Þorkell Sigurlaugsson . Fundarstjóri lýsti eftir öðrum framboðum. Aðrir gáfu ekki kost á sér. Fundarstjóri bar því fram tillögu um kjör áðurnefndra sem meðstjórnenda og var það samþykkt einróma.

Þá lágu fyrir fundinum tillaga um Örnu Þorsteinsdóttur, Jónínu Bjartmarz og Snorra Marteinssonar í varastjórn. Önnur framboð bárust ekki og var framboð þeirra einróma samþykkt.. Hvað skoðunarmann félagsins snertir var tillaga um Ómar Davíðsson einróma samþykkt, en aðrar tillögur um skoðunarmann voru ekki gerðar.

Engin önnur mál lágu fyrir fundinum en þau, að formanni var þökkuð vaskleg framganga í fjölmiðlaviðtölum í þágu Atvinnufjelagsins.

Fleira var ekki gert og var Aðalfundi slitið kl. 17:15

/HGJ

Gerum félagskerfi vinnumarkaðarins betra

Tue, 28 Dec 2021 10:50:44 GMT

Bilið hefur breikkað

Á undanförnum 30 árum hafa verulegar breytingar átt sér stað í fyrirtækjaflóru landsins. Geti fyrirtæki stækkað og styrkt þannig samkeppnisstöðu sína, gera þau það. Það hefur gerst í fjölda atvinnugreina í sjávarútvegi, verslunarrekstri, bankastarfsemi og fleiri greinum. Það er jákvætt ef það gerist ekki á kostnað þeirra sem minni eru. Sum fyrirtæki ná þeirri „eftirsóknarverðu“ stöðu að verða „of stór“ til að falla. Icelandair hefur lengi haft þessa stöðu innan íslensku ferðaþjónustunnar og minnstu munaði að bankakerfið yrði skilgreint þannig árið 2008. Önnur fyrirtæki verða það stór að þau telja sig eiga að ráða leikreglum samkeppninnar og samfélagsins.

Þrátt fyrir þessar breytingar í undirstöðum atvinnulífsins, hefur félagskerfi vinnumarkaðarins lítið breyst. Afleiðingar þess birtast fyrst og fremst í því að hagsmunir stórfyrirtækja eru allsráðandi fyrirtækjamegin innan þessa kerfis, sem er byggt upp á þeirri meginreglu að þeir ráða sem borga mest og þar sem völdin eru mest m.a. í formi skipunar stjórnar. Það er að mati AFJ bagaleg þróun, ekki hvað síst fyrir þá sök að langstærsti hluti launafólks starfa sem einyrkjar eða hjá litlum og meðalstórum fyrirtækjum.

Innbyggð mismunun í gjaldtöku og fjármálakerfinu

Þegar lítill eða enginn greinarmunur er gerður á milli lítilla og stórra í opinberri gjaldtöku og álögum þá leggst kostnaðarbyrði hlutfallslega mun þyngra á þá sem smærri eru, hvort sem það er útvarpsgjald eða margvíslegar álögur. Þessi kerfislæga mismunun gerir því smærri fyrirtækjum erfiðara að keppa sem getur dregið úr samkeppnishæfni eða skekkt samkeppnisstöðu fyrirtækja á hefðbundnum samkeppnismörkuðum. Þá er fjármálamarkaðurinn hér á landi með þeim ósköpum gerður að lánafyrirgreiðsla á eðlilegum kjörum er afar erfið hjá smærri fyrirtækjum enda hlýtur hagnaður bankakerfisins að koma þaðan. Stóru fyrirtækin hafa aðrar leiðir til fjármögnunar, hlutafjáraukningar, lántöku erlendis eða útgáfu skuldabréf.

Lífeyrissjóðakerfið þarf breytta fjárfestinga- og lánastefnu.

Lífeyrissjóðakerfið er sérstaklega sniðið að stórum skráðum fyrirtækjum eins og það séu þau einu arðsömu. Þar virðist ekki horft í áttina að litlu og meðalstóru fyrirtækjum í fagfjárfestingum fyrr en þau hafa stækkað og þá hækkað verulega í verði. Atvinnufjelagið vill leggja áherslu á breytingar á þessu í góðu samstarfi við lífeyrissjóðina. Margt gott má segja um stefnu ríkisstjórnarinnar því þar er loksins lögð áhersla á að lífeyrissjóðir geti ávaxtað eignir sínar með fjölbreyttari, en jafnframt öruggum hætti. Loksins verði fest í sessi heimild fyrir lífeyrissjóði að eiga yfir 20% í nýsköpunar og vaxtarsjóðum og meiri skilningur á mikilvægi innviðafjárfestinga þar sem mörg lítil og meðalstór fyrirtæki starfa um land allt. En til að þetta raungerist þurfa fulltrúar lítilla og meðalstórra fyrirtækja að sitja í stjórnun lífeyrissjóða, en ekki eingöngu fulltrúar stóru turnanna SA og ASÍ.

Innbyggð mismunun í kjarasamningum

Síðast en ekki síst endurspegla kjarasamningar ekki þann rekstrarveruleika sem lítil og meðalstór fyrirtæki standa andspænis nema að takmörkuðu leyti. Svo virðist sem fyrirtæki séu bundin að lögum hvað kjarasamning SA og ASÍ varðar, hvort heldur þau eru aðilar að samtökunum eða ekki. Þessi vandi hefur farið vaxandi undanfarin ár og bendir flest til þess að hann muni aukast enn frekar á komandi árum og áratugum eftir því sem umbylting atvinnulífsins eykst í tengslum við 4.iðnbyltinguna. Þar sem skapandi greinar, hugbúnaðargerð, ör þróun heilbrigðis- og líftækni, ferðaþjónustu, kvikmyndagerð og aðrar hugvitsdrifnar fara ört vaxandi. Ný tækifæri munu jafnframt skapast í orkutengdri starfsemi þar sem auðlindir eru nýttar til nýsköpunar. Þar geta gilt allt önnur lögmál um laun, kjarasamninga, kaupréttarsamninga, vinnutíma, vinnustað og menntun. Þarna verður vöxturinn mestur til velsældar og lífskjör almennings batna. Í kjaramálum þurfum við að komast inn í 21. öldina hvað þetta varðar.

Litlu og meðalstóru fyrirtækin eru verðmætust

Einyrkjar og litlu og meðalstóru fyrirtækin eru verðmætasti hluti vinnumarkaðarins atvinnulega og efnahagslega fyrir atvinnulífið um land allt þar með talið fyrir stærri fyrirtækin. Þetta er sá hluti vinnumarkaðarins þar sem flestir starfa, sem nýsköpun sprettur fram af, sem veitir vinnumarkaðnum nauðsynlegan sveigjanleika og efnahagsleg þróun til framtíðar. Þarna kemur einnig oft inn ungt, vel menntað og verðmætt starfsfólk fyrir framtíðina sem hefur látið minna fyrir sér fara í kröfugerð eða hagsmunabaráttu. Skapa þarf meiri skilning og sátt í samfélaginu ekki bara milli atvinnugreina og auðlinda þjóðarinnar heldur milli starfstétta, aldurshópa og stærðar fyrirtækja sem öll hafa sínu hlutverki að gegna í lífshlaupinu til vaxtar og velsældar.

Höfundur: Helga Guðrún Jónasdóttir, stjórnarmaður í Atvinnufjelaginu, www.afj.is

Umsögn um frumvarp til fjárlaga fyrir árið 2022 (1. Mál)

Tue, 14 Dec 2021 11:15:53 GMT

Atvinnufjelagið (AFJ), nýstofnað félag einyrkja og lítilla og meðalstórra fyrirtækja þakkar fyrir að vera boðið að veita umsögn um ofnagreint lagafrumvarp. AFJ hefur ekki haft tök á að rýna frumvarpið ítarlega á þeirri einu viku sem gafst til verksins og er hér því fyrst og fremst horft á stóru myndina, helstu hagsmunamál félagsmanna og hvað mætti betur fara í því efni.

Málefni félagsmanna AFJ koma eðlilega víða við sögu, en heilt yfir er ekki gætt nægilega vel að hagsmunum smærri fyrirtækja, einkum þeirra minnstu með t.d. 50-100 starfsmenn eða færri í samanburði við þau stærstu. Þar sem lang flest fyrirtæki á Íslandi eru lítil og meðalstór og með stærstan hluta vinnuaflsins er mikilvægt að horft sé sérstaklega til hagsmuna þeirra, en ekki sérstaklega stórfyrirtækja eins og venja stendur yfirleitt til hér á landi.

Hér er stiklað á því helsta sem Atvinnufjelagið leggur áherslu á í tengslum við fjárlög næsta árs og röðin ekki eftir einhverju sérstöku mikilvægi:

1. Tryggingagjald.

Hvað varðar málefni einyrkja og lítilla fyrirtækja þá leggst tryggingagjald afar þungt á þessa starfsemi þar sem mörg þessara fyrirtækja eru í uppbyggingarstarfsemi og forðast vegna margs konar launatengdra gjalda og flækjustigs að ráða starfsfólk í vinnu. Einyrkjar, það er sjálfstætt starfandi launþegar, ættu t.d. ekki að greiða tryggingagjald þar sem þeir njóta almennt ekki þeirra réttinda sem þessi skattheimta á að skila.

Þar sem því miður eru áform um að hækka tryggingagjaldið aftur um 0.25%, að tímabundinni lækkun þess lokinni, væri tilvalið að sæta lagi og horfa til þess að tryggingagjald taki mið af stærð fyrirtækja. Hvað einyrkja varðar ætti að fella það niður og hafa gjaldtökuna hófstillta hjá þeim fyrirtækjum sem eru t.a.m. með innan við 6-8 starfsmenn í vinnu. Óskað er eftir því, að leiðir til þrepaskiptrar innheimtu verði teknar til skoðunar sem liður í endurskoðun tryggingargjalds. Í skattakerfum eru persónuafslættir og stighækkandi skattar þekkt fyrirbæri og horfa mætti til slíkra aðgerða hvað tryggingagjald varðar.

2. Skattar, leyfisgjöld, sektir o.fl.

Flöt gjaldtaka leggst hlutfallslega mun þyngra á smærri fyrirtæki. Þetta fyrirkomulag á opinberri gjaldtöku, að hafa eitt gjald fyrir alla, var e.t.v. ekki óeðlileg á tímum þegar flest fyrirtæki voru af svipaðri stærð hér á landi. Með tilkomu stórfyrirtækjarekstrar hér á landi er öldin önnur og völdin önnur og mikilvægt er að hið opinbera fari að haga gjaldtöku með því móti að hún leggist hlutfallslega jafnar á fyrirtæki, allt eftir stærð og veltu. Lítið, en gott dæmi er útvarpsgjald. Verulega ósanngjarnt er, svo að ekki sé dýpra í árina tekið, að miða innheimtu þessa við kennitölur einstaklinga og fyrirtækja. Að stórt fyrirtæki með hundruð starfsmanna og útgerðarmaður smábáts eða listamaður greiði sömu upphæð sem framlag til RUV er birtingarmynd óréttlætisins, þótt hver upphæð sé ekki há. Fara þarf í gegnum opinbera innheimtu, s.s. þjónustugjöld, eftirlitsgjöld, skatta og sektir opinberra aðila og stofnana hvað þetta varðar.

3. Aðkoma lífeyrissjóða að litlum og meðalstórum fyrirtækjum.

Það er jákvætt að lögð er áhersla á að lífeyrissjóðir fá aukið svigrúm til fjárfestinga í Vísisjóðum og þeir taka þátt í framtakssjóðum, innviðum og í vaxandi mæli erlendis, en lífeyrissjóðir mættu samt hafa ríkari heimildir til lánveitinga og hlutafjárkaupa í litlum og meðalstórum vaxtarfyrirtækjum. Þau skipta okkar atvinnulíf og sérstaklega ungt fólk miklu máli. Hafa þar einnig margir góðir ávöxtunarkostir lífeyrissjóðanna tapast í gegnum tíðina, fyrirtæki sem nú eru metin á tugi milljarða. Alltaf þarf að vega og meta tækifæri framtíðarinnar en ekki horfa til fortíðar. Almennt er skortur á samhæfingu og framtíðarsýn hvað varðar fjárfestingar og þróun atvinnu- og menntastefnu ef halda á uppi velferðarkerfi framtíðarinnar þarf hver einstaklingur og hvert fyrirtæki að skapa aukin verðmæti.

Sem dæmi má nefna að mjög fáir lífeyrissjóðir hafa undanfarin ár séð þau tækifæri sem hafa augljóslega verið að skapast í greinum á sviði heilbrigðis- og lífvísinda, fiskeldis, upplýsingatækni og skapandi greina; greina sem eru drifkraftur fjórðu iðnbyltingarinnar. Mörg þessara fyrirtækja eru annað hvort ekki innan hagsmunasamtaka atvinnulífsins eða ná ekki athygli enda fulltrúar þeirra sjaldan í stjórnum þeirra samtaka eða stjórnum lífeyrissjóða, sem kjörnar eru af svokölluðum „aðilum vinnumarkaðarins“ þótt til séu sjóðir þar sem stjórnir eru valdar af sjóðsfélögum. Ákveðin blanda í þessu efni gæti verið áhugaverð auk þátttöku smærri fyrirtækja.

4. Bankakerfið í sterkri stöðu.

Fram til þessa hefur bankakerfið verið að mestu í ríkiseigu og hefur lagt áherslu á að tryggja hagsmuni og arðsemi sína til hins ítrasta. Sérstaklega hefur krafa um fasteignaveð verið mörgum áhugaverðum og arðsömum fyrirtækjum í hópi þeirra smærri verið erfitt. Þau hafa í vaxandi mæli leigt af fasteignafélögum og eiga ekki veðmöguleika. Af þeim sökum er ekki horft á þau raunverulegu tækifæri og trúverðugleika sem eigendur ættu að njóta. Með áframhaldandi einkavæðingu bankanna, sem boðað er í fjárlagafrumvarpinu, gæti þetta breyst og samkeppni aukist. Einnig mætti ríkisvaldið horfa meira til þess að styðja við lítil fyrirtæki í nýsköpunargreinum og grænum fjárfestingum um allt land og hvetja til þess með nýstofnuðu ráðuneyti vísinda, iðnaðar og nýsköpunar auk matvælaráðuneytis o.fl.

Stærri fyrirtæki, einkum þau sem eru skráð á hlutabréfamarkaði hafa mun betri tækifæri til fjármögnunar, m.a. erlendis, og sumar atvinnugreinar eins og sjávarútvegur, flutningsfyrirtæki, tryggingafyrirtæki og fjölmörg önnur stærri fyrirtæki eru áreiðanlega ekki að halda uppi hagnaði viðskiptabankahluta bankakerfisins. Þetta er fyrst og fremst lagt fram til skoðunar fyrir fjárlaganefnd.

5. Skattrannsóknir og skatteftirlit.

Efla ber skattrannsóknir og skattaeftirlit, ekki eingöngu með tilliti til peningaþvættis heldur ekki síður vegna þess hve samkeppnisstaða fyrirtækja skekkist við margítrekuð skattlagabrot og kennitöluflakk. Þrátt fyrir margra ára umræðu um þetta virðist lítið hafa áunnist eins og nýlega dæmi sýna. Þótt atvinnufrelsi sé í landinu getur varla talist ásættanlegt að skattsvikafrelsi sé ítrekað liðið í reynd og sjaldnast innheimtast þær fjársektir sem fólk er dæmt í. Ákveðnar atvinnugreinar eru sérstaklega viðkvæmar fyrir þessu. Leggja þarf þyngri áherslu á þennan þátt hjá skattayfirvöldum, en þetta snertir einnig beint heimild fyrirtækja til að taka að sér VSK skil.

6. Kjarasamningar.

Segja má að stærsta einstaka verkefni AFJ sé að stuðla að breytingum á eðli og inntaki kjarasamninga. Samskipta- og starfshefðir vinnumarkaðarins hér á landi hafa verið fordæmalausar, ef horft er til hinna Norðurlandanna. Hér eru hefðir eða átakamenning sem byggir á því að halda hagkerfinu í helgreipum hótanna og launadrifinnar verðbólgu. Margt stefnir í að svo verði áfram. Lítil og meðalstór fyrirtæki hafa litla möguleika annað en að dragast með inn í þennan vítahring án tillit til þess hvers konar starfsemi á í hlut. Eitt stærsta og mikilvægasta verkefni næstu ára er að aga samskipti á vinnumarkaði með heildarhagsmuni 2 atvinnulífsins og efnahagslegan stöðugleika fyrir augum. Mikilvægur liður í því er að byggja upp og efla embætti ríkissáttasemjara að norrænum fyrirmyndum og ánægjulegt að sjá að ríkisstjórnarsáttmálinn fjallar um það efni.

Sjaldan eða aldrei hefur endurbætt samskiptamenning á vinnumarkaði verið mikilvægara en nú, þegar meginalda fjórðu iðnbyltingar er að halda innreið sína í samfélagið. Stundum mætti ætla að vinnumarkaðurinn eins og hann var á fyrri hluti 20. aldar væri enn við lýði og lítið vera aflögu

fyrir hugvitið og samstarf sem aflvaka þessara tæknidrifnu breytinga sem eru að umbreyta atvinnulífinu. Nálgast þarf viðfangsefnið út frá almennum forsendum, en ekki sérhagsmunum stórfyrirtækja og ekki er síður brýnt að fagleg vinnubrögð séu höfð í heiðri, en ekki þröngir flokkspólitískir hagsmunir eða stéttapólitísk sem er sérstakt hugðarefni einstakra forystumanna innan verkalýðshreyfingarinnar.

7. Nýsköpun verður mest hjá litlum og meðalstórum fyrirtækjum.

Hugvitið verður í grunninn oft drifið áfram af sérfræðingum í litlum fyrirtækjum og sprotum. Þessir sérfræðingar eiga fátt sameiginlegt með þeim lægst launuðu á launamarkaði og fyrirtæki þeirra starfa á allt öðrum forsendum, en stórfyrirtæki og með allt annan vinnutíma, starfs- og launaumhverfi. Þetta sést best núna þegar verið er að uppgötva alvarlega öryggisgalla á tölvukerfum fyrirtækja og jafnvel einstaklinga. Það uppgötvast jafnvel í litlum fyrirtækjum þar sem starfsmenn hafa menntast á undanförnum 5-10 árum hér á landi og erlendis í nýrri mikilvægri atvinnugrein.

Í samskiptum við fjölmargar atvinnugreinar t.d. smábátaeigendur sem eru jafnvel orðnir á tiltölulega stórum bátum, lítil og meðalstór fjölskyldufyrirtæki, nýsköpunarfyrirtæki og svo mætti áfram telja, eru ófáar sögurnar um hvað mætti betur fara í rekstrarumhverfi þeirra, einyrkja og lítilla og meðalstórra fyrirtækja. Upphafið þarf stundum að skoðast við gerð fjárlaga,

en helst miklu fyrr, að ekki sé minnst á það spretthlaup sem ríkir í ár. Reyndar eiga þessi mál einnig heima í öðrum lagabálkum sem Atvinnufjelagið mun vonandi fá tækifæri til að koma að.

Atvinnufjelagið hvetur háttvirta fjárlaganefnd til beita sér fyrir því að gerðar verði breytingar til einföldunar á þessu rekstrarumhverfi, bæði hvað eftirlit og gjaldtöku snertir og jafnræði í atvinnulífinu. Þá verður að gera gangskör að því að stafvæða samskipti fyrirtækja og opinberra aðila á öllum stigum, til að draga úr kostnaði og þeim tíma sem þessi samskipti krefjast að óbreyttu. Það er vissulega í gangi en mikið verk er framundan.

8. Að lokum.

Fram kom ríkur vilji hjá öllum ríkisstjórnarflokkum að bæta opinbera stjórnsýslu, kjarasamninga, auka nýsköpun, stokka upp í stjórnarráðinu og í tilfelli a.m.k. tveggja ríkisstjórnarflokka að lækka skatta ekki síst hjá almenningi og litlum og meðalstórum fyrirtækjum. Stóru fyrirtækin bjarga sér frekar sjálf með sterkari hagsmunatengslum með örfáum undantekningum, en þau verða þá oft þjóðhagslega mikilvæg og njóta sérstöðu.

Atvinnufjelagið er tilbúið til samstarfs með öllum þeim sem vilja vinna með hagsmuni einyrkja og lítilla og meðalstórra fyrirtækja fyrir augum, bæði atvinnurekendum og launþegahreyfingum.

Virðingarfyllst,

Fyrir hönd stjórnar Atvinnufjelagsins

Höfundur: Þorkell Sigurlaugsson, viðskiptafræðingur og meðstjórnandi í AFJ

Tveggja turna tal ASÍ og SA

Wed, 01 Dec 2021 10:03:52 GMT

Atvinnufjelagið vill að rödd lítilla og meðalstórra fyrirtækja heyrist og þeirra hagsmuna sé gætt í atvinnuuppbyggingu nýsköpunarhagkerfis 21. aldar.

Í grein sinni, „Níu áskoranir á nýju kjörtímabili“, sem Friðrik Jónsson, formaður BHM, birti í Kjarnanum hinn 26. september sl., fer hann yfir stöðuna á vinnumarkaði í upphafi nýs kjörtímabils, eins og hún blasir við honum. Það gerði hann einnig í síðasta þætti Sprengisands á Bylgjunni. Áskoranir sem bíða stjórnvalda og vinnumarkaðarins eru margar. Greinin er um margt athyglisverð, en e.t.v. fyrir nokkuð aðrar sakir en þær sem Friðrik sjálfur nefnir.

Friðrik kemur inn á hluti, sem hefur til skamms tíma farið heldur lítið fyrir í umræðunni. Hann bendir þannig á að hugvit vigti ekki nægilega þungt á vogarskálum vinnumarkaðarins, með þeim afleiðingum m.a. að nýsköpunarhagkerfið hafi enn ekki náð að festa rætur hér á landi. Góða gamla auðlindahagkerfið lifi því enn góðu lífi á kostnað vaxtarmöguleika til framtíðar litið, efnahagslegs stöðugleika og velferðaruppbyggingar.

Skaðlegar samskipta- og starfsaðferðir vinnumarkaðarins

Mesta athygli vekur þó umbúðalaus gagnrýni BHM-formannsins á samskipta- og starfshefðir vinnumarkaðarins. Hér sé um hefðir að ræða, sem haldi vexti hagkerfisins föstum í viðjum hótana og annarrar niðurrifsstarfsemi, sem kemur svo aftur niður á lífskjörum „okkar allra“ eins og það er orðað.

Heyr, heyr. Orð í tíma töluð. Vonandi duga síðan þau ráð sem Friðrik vill hafa í þessum efnum og það er að hefja samtalið strax og vanda vel til verka. Því miður bendir þó fátt til þess. Á því virðist ekki nægur áhugi, enda bendir flest til þess að núverandi verkalýðsforysta hafi mun meiri áhuga á fortíðinni og hefur barátta launafólks verið keyrð áratugi aftur í tímann, jafnvel aftur til hagkerfis nítjándu og fyrri hluta tuttugustu aldar.

Afar mikilvægt er að aðilar vinnumarkaðarins eigi uppbyggilegt samtal um stefnu og þróun vinnumarkaðarins til framtíðar litið; hvernig launaþróun við viljum sjá, hvers konar atvinnusköpun stendur undir þeim kröfum sem við gerum til framtíðarinnar í lífskjörum og velferð. Vilji verður að vera fyrir hendi um að finna svör sem báðir aðilar geta ásamt stjórnvöldum unnið með, þ.e. launafólk og launagreiðendur eða atvinnurekendur.

Snúum af braut átaka og ófriðar til bættra lífskjara og hagsældar

Annars staðar á Norðurlöndunum hefur þetta samtal tryggt launafólki samfellt hagvaxtarskeið og aukinn kaupmátt um áratugaskeið. Hér á landi mörkuðu þjóðarsáttarsamningarnir árið 1990 upphafið að sambærilegri þróun. Því miður gekk það þó ekki eftir og má segja að vonin hafi endanlega orðið að engu í eftirleik hrunsins. Á síðustu 10 árum virðist hafa skipt meira máli, í það minnsta hjá sumum aðildarfélögum ASÍ, að efna til ófriðar við vinnuveitendur en að efla kaupmáttar- og hagvaxtarþróun hér á landi.

Afleiðingarnar, ef svo má segja, birtast ekki síst í því tveggja turna tali ASÍ og SA sem yfirskyggir flest annað á vinnumarkaðnum og snýst í stuttu máli um kjör hinna lægst launuðu og rekstrarforsendur hjá stórfyrirtækjum landsins. Sá mikli meirihluti launþega og fyrirtækja sem falla ekki undir þetta tal stendur óbættur hjá garði eða nýtur ekki sannmælis. Þetta hefði ekki slompast eitthvað áfram um sinn, ef ekki væri fyrir Covid-19. En tíminn er á þrotum.

Nýsköpun, hugverkaiðnaður og skapandi atvinnugreinar

Sjaldan eða aldrei hefur nýr samskiptamáti verið mikilvægari en nú, þegar meginalda fjórðu iðnbyltingar er að halda innreið sína í samfélagið. Miðað við þann 19. aldar og fyrri hluta 20. aldar vinnumarkað sem ASÍ vinnur að virðist lítið vera aflögu fyrir hugvitið, aflvaka þessara tæknidrifnu breytinga sem eru að umbreyta atvinnulífinu. Hugvitið verður í grunninn rekið af sérfræðingum í litlum fyrirtækjum og sprotum. Þessir sérfræðingar eiga fátt sameiginlegt með þeim lægst launuðu og fyrirtæki þeirra starfa á allt öðrum forsendum en stórfyrirtæki.

Allir sem vilja geta séð að rétta þarf þessa neikvæðu þróun af. Afar brýnt er að við förum að ræða um stöðu og þróun vinnumarkaðarins út frá heildarhagsmunum vinnumarkaðarins. Nálgast þarf viðfangsefnið út frá almennum forsendum, en ekki sérhagsmunum og ekki er síður brýnt að fagleg vinnubrögð séu höfð í heiðri, en ekki þröngir flokkspólitískir hagsmunir eða stéttapólitík sem er sérstakt hugðarefni einstakra forystumanna verkalýðshreyfingarinnar.

Atvinnufjelagið vill horfa til nýrra vinnubragða og þarfa

Atvinnufjelagið (AFJ) er nýtt hagsmunafélag lítilla og meðalstórra fyrirtækja sem ætlað er að mæta þessari þróun. Við hjá AFJ erum sannfærð um mikilvægi menntunar, sveigjanleika vinnumarkaðarins, vaxandi vægis einyrkja á vinnumarkarði og lykilstöðu lítilla og meðalstórra fyrirtækja fyrir íslenskt efnahags- og atvinnulíf. Okkur finnst því tímabært að breikka umræðuna á vinnumarkaði og freista þess að ná samtalinu í gang í samvinnu við þá sem eru sammála okkur um að breytinga sé þörf; að tími bætta samskipta á vinnumarkaði sé runninn upp með hagsmuni heildarinnar að leiðarljósi og lítil og meðalstór fyrirtæki njóti sannmælis. Nánari upplýsingar um AFJ eru á vefnum okkar www.atvinnufjelagid.is .

Verið velkomin í félagið og stofnfundinn sem verður haldinn innan skamms.

Höfundur: Helga Guðrún Jónasdóttir

Af hverju vantar hagsmunafélag lítilla og meðalstórra fyrirtækja?

Thu, 18 Nov 2021 16:09:38 GMT

Sá aðili sem ætti að sinna hagsmunamálum alls atvinnulífsins þ.e Samtök Atvinnulífsins (SA) nær ekki að verja hagsmuni lítilla og meðalstórra fyrirtækja þegar hagsmunir þeirra fara ekki saman með hagsmunum stóru fyrirtækjanna.

Stór fyrirtæki er mikilvæg fyrir atvinnulífið og oft burðarás í hagvexti en hagsmunir þeirra fara ekki alltaf saman við hagsmuni lítilla og meðalstórra fyrirtækja. Stóru fyrirtækin geta samt ekki án þessara fyrirtækja verið. Reglur SA eru auk þess þannig að þeir stærstu ráða mestu bæði hvað varðar kjaramál og fjölmörg önnur hagsmunamál svo sem fjármál, regluverk og skattlagningu. Þetta er að koma berlega í ljós þessa dagana.

Lítil og meðalstór fyrirtæki hafa setið eftir.

Í stuttu máli eru reglur SA og undirfélaga þannig að þau fyrirtæki sem borga mest, ráða mest. Þær reglur hafa ekki breyst í áranna rás og því má segja að með tilkomu risa fyrirtækja m.a. í sjávarútvegi, samþjöppun í verslunargeiranum o.fl. þá hafa lítil og meðalstór fyrirtæki setið eftir. Atkvæðavægi innan SA hefur því færst á færri hendur með tilkomu þessara stóru fyrirtækja og því er SA ekki lengur sú breiðfylking atvinnulífsins sem þau þurfa að vera..

Seðlabankastjóri benti á að SA samdi í raun af sér í síðustu kjarasamningum. Lífskjarasamningurinn er hrópandi dæmi um það hversu litlu sambandi SA er við litla og meðalstóra atvinnulífið í landinu og í raun þann veruleika sem þau búa við.

Loksins núna heyrist í SA, en tilefnið er vaxtahækkun seðlabankastjóra sem hefur áhrif á allt atvinnulífið en þar sem þetta bítur fyrst núna á stóru fyrirtækin, eins og óraunhæfar launahækkanir þá fer SA í gang.

Loksins eignast lítil og meðalstór fyrirtæki talsmann, - Atvinnufjelagið (AFJ)

Lítil og meðalstór fyrirtæki hefðu fyrir löngu þurft hagsmunafélag, umræðu, nýjar aðgerðir og lausnir . Við erum að tala um rúmlega 90% af öllum fyrirtækjum landsins að einyrkjum meðtöldum og mikinn meirihluta starfsfólks í landinu.

Um leið og við erum þakklát fyrir að SA sé loksins að láta í sér heyra, þá sýnir þetta svo ekki sé um villst að hagsmunir lítilla og meðalstórra fyrirtækja hafa ekki fengið athygli innan SA og ekki komist að samningaborðinu þegar síðustu kjarasamningar voru gerðir.

Þessi stærð fyrirtækja hafa ekki átt sér hagsmunafélag, fyrr en loksins nú með tilkomu Atvinnufjelagsins AFJ, sem stofnað var þann 31.október s.l

Atvinnufjelagið vill samtal við hin ýmsum samtök atvinnulífsins, verkalýðshreyfinguna og ekki síst stjórnvöld hvernig létta þarf álögum af litlum og meðalstórum fyrirtækjum. SA mun ekki beita sér fyrri því, enda óttast félagið að það þýddi hærri álögur á stóru fyrirtækin. Staðan í dag er sú að hlutfallslega eru lítil og meðalstór fyrirtæki að borga miklu miklu meira til samfélagsins.

Atvinnufjelagið mun standa vörð um hagsmuni lítilla og meðalstórra fyrirtækja á Íslandi. Til þess að félagið geti það, þá þurfa einyrkjar, lítil og meðalstór fyrirtæki að skrá sig í félagið. Við fáum góðar undirtektir og félögum fjölgar, en miklu meira þarf til svo við náum sem fyrst að taka af alvöru þátt í að breyta því umhverfi sem við búum við í dag. Við hvetjum því alla að vera með okkur í liði og skrá sig í félagið!

Höfundur: Sigmundur Vilhjálmsson

Stofnfundur Atvinnufjelagsins

Thu, 04 Nov 2021 10:38:18 GMT

Stofnfundur Atvinnufjelagsins var haldinn í Grósku Hugmyndahúsi þann 31. október 2021. Hér má sjá samantekt frá þeirri kynningu sem var haldin.

atvinnufelag

Aðalfundur Atvinnufjelagsins 2025

Í húsnæði Maven, Höfðabakka 9, kl. 16:30. Taktu daginn frá.

Tryggingagjaldsskýrslan í heild sinni

Þegar betur er að gáð er tryggingagjaldið ekki gjald heldur vanhugsuð skattheimta sem leggst misþungt á fyrirtæki. Eðlilegri og réttlátari framkvæmd væri að reikna gjaldið af heildarveltu en ekki launaveltu. Brýnt að endurskoða framkvæmd gjaldsins að sögn formanns AFj.

Skorað á Valkyrjurnar

Atvinnufjelagið skorar á nýja ríkisstjórn að endurskoða framkvæmd tryggingagjalds. Skattur en ekki gjald sem leggst hlutfallslega þyngst á lítil og meðalstór fyrirtæki, eins og staðfest er í nýrri úttekt Atvinnufjelagsins.

Sláandi niðurstöður

Aðalfundargerð 20.06.2024

Aðalfundur Atvinnufélagsins

Skýrsla stjórnar starfsárið 2023-2024

Fundað með verkalýðs- og hagsmunafélögum

Stækka þarf Atvinnufjelagið enn frekar

Skakkt rekstrarumhverfi atvinnulífsins

Er dýrt að reka fyrirtæki á Íslandi

Atvinnufjelagið kallar eftir myndarlegri aðkomu stjórnvalda að kjaraviðræðum

Stjórn fundar með formanni Starfsgreinasambandsins

Nýtt starfsár hafið hjá Atvinnufjelaginu

Aðalfundargerð 28.06.2023

Skýrsla stjórnar starfsárið 2022-2023

Í tilefni aðalfundar AFJ 2023

Fréttabréf AFJ - starfsárið 2022-2023

Starfsemi Atvinnufjelagsins starfsárið 2022-2023

Breytingar taka tíma og vinnu

Kjaraviðræðurnar

Ný stjórn kosin á vormánuðum 2022

Hagsmunir AFJ og samtal við forystumenn

Aðalfundargerð 29.06.2022

Gerum félagskerfi vinnumarkaðarins betra

Umsögn um frumvarp til fjárlaga fyrir árið 2022 (1. Mál)

Tveggja turna tal ASÍ og SA

Af hverju vantar hags­muna­fé­lag lítilla og meðal­stórra fyrir­tækja?

Lítil og meðalstór fyrirtæki hafa setið eftir.

Loksins eignast lítil og meðalstór fyrirtæki talsmann, - Atvinnufjelagið (AFJ)

Stofnfundur Atvinnufjelagsins

Af hverju vantar hagsmunafélag lítilla og meðalstórra fyrirtækja?